Garðyrkjuskóli LbhÍ á Reykjum í Ölfusi verður með opið hús á Reykjum á sumardaginn fyrsta, næstkomandi fimmtudag,. Húsið opnar klukkan 10.00 fyrir gesti og gangandi. Hátíðardagskrá hefst kl 14.00.
Garðyrkjunemendur og starfsfólk bjóða fólki að blómstra með sér á nýju sumri. Meðal þess sem í boði er er glæný uppskera af hnúðkáli, kaffiveitingar að hætti hússins og markaðstorg með grænmeti, garðplöntum, blómum og fleiri kræsingum. Þá verður ýmislegt skemmtilegt fyrir börnin m.a. ratleikur um svæði skólans. Hægt verður að líta inn í hitabeltisgróðurhús skólans, en þar er að finna stærstu bananaplantekru Evrópu. Bananarækt hófst árið 1951 og er árleg uppskera 100-120 klasar. Í sama húsi eru einnig ræktaðar fíkjur og kaffibaunir. Verkefni skrúðgarðyrkjunemenda verða til sýnis í verknámshúsi skrúðgarðyrkjunnar auk þess sem þar verður hægt að kaupa pylsur og ís. Starfsfólk LbhÍ mun kynna nám við skólann sem og spennandi námskeið sem Endurmennturnardeild LbhÍ stendur fyrir. Þá veitir Sigmundur Davíð Gunnlaugsson, forsætisráðherra, garðyrkjuverðlaunin 2015. Forseti Íslands, Ólafur Ragnar Grímsson veitir umhverfisverðlaun Hveragerðisbæjar 2015 og Illugi Gunnarsson veitur umhverfisverðlaun Ölfuss 2015.
Nú er allt í blóma í gróðurhúsum Garðyrkjuskólans og tilvalið að sækja sumarið þangað!
Gestir skoða verkefni skrúðgarðyrkjunema
Hægt verður að skoða stærstu bananaplantekru Evrópu
