Tveir starfsmenn Landbúnaðarháskóla Íslands, þeir Magnus Göransson og Dr Jón Hallsteinn Hallsson, ásamt teymi vísindafólks frá Norðurlöndunum, birtu nýverið grein í tímaritinu Frontiers in Plant Science þar sem borið er kennsl á áður óþekktar samsætur sem mikilvægar eru fyrir aðlögun byggs að íslenskum aðstæðum. Í greininni er líst tilraunum sem fram fóru átta stöðum á Norðurlöndunum og í Þýskalandi með það fyrir augum að finna erfðaþætti sem stýrt geta aðlögun byggs að norðurslóðum.
Á meðal helstu niðurstaðna var að fjölmörg erfðamörk tengjast blómgun í byggi en þar komu þó fram þrjú erfðamörk sem hafa afgerandi áhrif á þroskun byggs að teknu tilliti til hitasummu vaxtartímabilsins. Frekari rannsókna er þörf til að bera kennsl á þau gen sem stýra þessum áhrifum en fram að því má nýta erfðamörkin til að flýta aðlögun yrkja að íslenskum aðstæðum. Rannsóknirnar voru fjármagnaðar með styrk frá Norrænu ráðherranefndinni (No. PPP_02) og með framlögum frá norrænum kynbótafyrirtækjum.
Greinina, sem birt er í opnum aðgangi, má nálgast hér
