Námskeið á vegum Landgræðsluskólans í Úganda

Starfsmenn frá LbhÍ og Landgræðslunni eru þessa dagana staddir í Masindi, Úganda við kennslu á námskeiði er kallast Sjálfbær landnýting, vistheimt og tengsl við loftslagsbreytingar. Námskeiðið er haldið á vegum Landgræðsluskóla Háskóla Sameinuðu þjóðanna í samstarfi við umhverfisstofnun Úganda (National Environment Management Authority) og Makerere háskóla. Þátttakendur á námskeiðinu eru umhverfisfulltrúar frá héruðum í vesturhluta Úganda og voru þeir 25 umhverfisfulltrúar sem sitja námskeiðið núna valdir úr stórum hópi umsækjenda.

Þetta er í annað námskeiðið um þetta efni sem Landgræðsluskólinn heldur í Úganda. Það stendur yfir í átta daga og er blanda af fræðilegum fyrirlestrum, umræðum þar sem umhverfisfulltrúarnir deila sinni reynslu, verkefnavinnu og útikennslu.

Þrátt fyrir ólíkt loftslag og umhverfi í vesturhluta Úganda og Íslandi eiga löndin margt sameiginlegt þegar kemur að vandamálum í sambandi við landhnignun. Að sama skapi getum við lært mikið af hvert öðru um hvernig best er að koma í veg fyrir frekari hnignun sem og í aðferðum við endurheimt vistkerfa.

Mynd: Hafdís Hanna fræðist um vandamál vegna ósjálfbærrar landnýtingar frá James Bond Kunobere landnýtingarsérfræðingi. Ljósmynd Jóhann Þórsson

Mynd: Moses skógaeftirlitsmaður (í rauðum bol) segir frá starfi sínu við að vernda skóga fyrir ólöglegri nýtingu. Kennarar og aðrir aðstandendur námskeiðsins fylgjast áhugasamir með. Ljósmynd Ása Aradóttir