Miðvikudaginn 7. október nk. ver Myrra Ösp Gísladóttir meistararitgerð sína, Mat á gæðum aðalskipulagsáætlana - notagildi gátlista við aðalskipulagsgerð, við umhverfisdeild LbhÍ. Leiðbeinendur eru Dr. Sigríður Kristjánsdóttir og Hjalti Steinþórsson hrl. Prófdómari er Bjarni Reynarsson. Athöfnin fer fram á Keldnaholti í Reykjavík og hefst kl 15.00. Allir velkomnir.
Um verkefni Myrru:
Fyrstu skipulagslögin tóku gildi árið 1921 og voru þá aðeins kauptún og sjávarþorp, sem höfðu lágmarksfjölda íbúa upp á 500, skipulagsskyld. Skipulagsskylda tók þónokkrum breytingum eftir því sem á leið og samkvæmt núgildandi skipulagslögum nr.123/2010 segir að skipulagsskylda nái til alls lands og hafs innan marka sveitarfélaga og að sveitarfélög skuli á hverjum tíma hafa í gildi aðalskipulag.
Markmiðið með verkefninu var að varpa ljósi á styrkleika og veikleika íslenskrar aðalskipulagsgerðar með því að nota gátlista við yfirferð 13 aðalskipulagsáætlana og komast að því hvert notagildi slíks gátlista er í íslensku skipulagskerfi. Auk þess sem þróun aðalskipulags var skoðuð út frá lagalegu samhengi.
Árið 2003 gaf Skipulagsstofnun út ítarlegt leiðbeiningarit sem ber heitið Leiðbeiningar um gerð aðalskipulags – ferli og aðferðir. Tilgangurinn með útgáfu þess var að gera grein fyrir ákvæðum, þágildandi, skipulags- og byggingarlaga og skipulagsreglugerðar um aðalskipulagsgerð og þar með leiðbeina sveitarfélögum eða öðrum þeim er vinna að aðalskipulagsgerð um útfærslu þess. Þetta leiðbeiningarit er í dag úrelt og því tímabært að koma nýjum og bættum leiðbeiningum, um aðalskipulagsgerð, í hendur sveitarstjórna.
Niðurstöður verkefnisins sýndu að notkun gátlistans hefur þann möguleika, að auka gæði aðalskipulagsáætlana, hann sýndi fram á hverjir styrkleikar og veikleikar íslenskra aðalskipulagsáætlana eru út frá kröfum gátlistans, auk þess að í ljós kom að hann á vel við íslenskar aðstæður. Niðurstöður sýndu það einnig, að þær breytingar sem hafa átt sér stað í íslenskum skipulagslögum hafa haft jákvæð áhrif á gæði aðalskipulagsáætlana, út frá kröfum gátlistans. Gátlistann er bæði hægt að hafa til hliðsjónar á meðan á aðalskipulagsvinnunni stendur og einnig í lokin til að yfirfara það sem er komið og fá á hreint hvort það er eitthvað sem þurfi að bæta.
