Nana Esi A. Aidoo frá Ghana kynnir sitt verkefni
Stór dagur var hjá nemendum Landgræðsluskóla Háskóla Sameinuðu þjóðanna þegar þau kynntu lokaverkefnin sín á opinni málstofu á Keldnaholti. Í ár nema 17 sérfræðingar frá níu löndum Afríku og Mið-Asíu við skólann. Í heimalöndum sínum starfa þau sem sérfræðingar við háskóla, ráðuneyti, héraðsstjórnir, og rannsókna- og eftirlitsstofnanir á sviði landnýtingar- og landverndarmála. Rannsóknarverkefnin þeirra voru fjölbreytt að vanda og afar áhugaverð. Fjölluðu þau m.a. um gerð og nýtingu moltu til landgræðslu, mat á ástandi lands við rætur Heklu og gerð landgræðsluáætlana fyrir þann hluta svæðisins sem er í slæmu ástandi, viðhorf námuverkamanna í Gana til auðlindagjalds sem nýtt verður til landgræðslu, og aðlögun að loftslagsbreytingum í Úganda séð með kynjagleraugum. Þann 14. september nk. útskrifast síðan nemarnir við hátíðlega athöfn á Keldnaholti og stuttu síðar halda þau aftur heim til síns heima og miðla þeirri þekkingu sem þau hafa öðlast hér á landi á sínum vinnustöðum.
Nánar frá viðburðinum og myndir hér
