Á laugardag verður haldinn fræðsludagur í Reiðmanninum á Hvanneyri þar sem nemendur í Reiðmanninum I og II á vegum Endurmenntunar LBHÍ koma saman í skólahúsnæði Landbúnaðarháskóla Íslands á Hvanneyri og hestamiðstöðinni á Mið-Fossum og fá bæði bóklega og verklega fræðslu. Nemendur í Reiðmanninum III verða svo með á Mið-Fossum og fá verklega sýnikennslu með öðrum reiðnemendum. Þátttaka á fræðsludeginum er með því besta sem þekkist og eru rúmlega 130 manns skráðir til þátttöku.
Fjöldi sérfræðinga verða með erindi: Einar Ásgeirsson fóðurfræðingur verður með fyrirlestur um vetrarfóðrun reiðhesta, Gunnar Halldórsson járningamaður verður með fyrirlestur um járningar og hófhirðu, Hrefna Sigurjónsdóttir doktor í dýraatferlisfræði verður með fyrirlestur um félagshegðun hesta og Sigríður Björnsdóttir sérgreinadýralæknir hrossa verður með fyrirlestur um heilsu og velferð íslenska hestsins.
Seinnipartinn er svo sýnikennsla á Mið-Fossum þar sem 6 af reiðkennurum Reiðmannsins verða með sýnikennslu.
Reiðmaðurinn er nám ætlað fróðleiksfúsum reiðmönnum og áhugafólki um reiðmennsku sem vill auka þekkingu sína og færni í reiðmennsku, hrossarækt og almennu hestahaldi, og ekki síður fyrir reiðmenn sem vilja fara í þá vinnu að eflast sem manneskjur. Þrjár námsleiðir eru í boði, Reiðmaðurinn I, Reiðmaðurinn II og Reiðmaðurinn III.
Í vetur er nám í Reiðmanninum haldið á 11 stöðum hringinn í kringum landið og eru um það bil 150 manns sem stunda reiðmannsnám hjá Endurmenntun.
Allar nánari upplýsingar um nám í Reiðmanninum er að finna á vef Endurmenntunar LBHÍ.
