Vönduð hófhirða og járning skipta miklu máli fyrir heilbrigði, velferð og endingu hesta og því mjög mikilvægt að vandað sé vel til verka.
Endurmenntun Landbúnaðarháskóla Íslands (LBHÍ) býður upp á tvö námskeið í járningum og hófhirðu.
Annað námskeiðið er 7 vikna langt námskeið sem metið er til 4 ECTS eininga á háskólastigi þar sem þátttakendur sitja sama námskeið og nemendur í BS námi í hestafræði við LBHÍ. Námskeiðið er kennt í staðnámi og fjarnámi frá 19. ágúst til 6. október. Á námskeiðinu er farið yfir þróun og tilgang járninga og hófhirðu hrossa, líffærafræði neðri hluta fótar með áherlsu á uppbyggingu hófsins, eðli hans og hirðingu. Fjallað er um mikilvægi réttrar hófhirðu við uppeldi hrossa, umhirðu hófa reiðhrossa og umhirðu og eftirlit á hófum stóð- og unghrossa. Farið er yfir mismunandi tegundir skeifna, hóffjaðra og annarra efna tengdum járningum og nemendur fá leiðsögn um notkun helstu verkfæra til járninga og þjálfun í grunnþáttum járninga. Áfanginn er án lokaprófs og vægi verkefna 100%. Skyldumætingar er krafist í verklega kennslu og á námskeiðinu eru 20 verklegir tímar á þeim 7 vikum sem námskeiðið stendur yfir, skráning og nánari upplýsingar: https://endurmenntun.lbhi.is/jarningar-og-hofhirda_4ects/
Hitt námskeiðið er bóklegt og verklegt helgarnámskeið sem haldið er hjá LBHÍ á Hvanneyri helgina 2.-3. nóvember. Á þessu námskeiði er farið stuttlega yfir líffærafræði neðri hluta fótar með áherslu á uppbyggingu hófsins, eðli hans og hirðingu, mikilvægi réttrar hófhirðu, skeifur og verkfæri til járninga, auk þesss sem þátttakendur frá undirstöðuþjálfun við járningar. Skráning og nánari upplýsingar: https://endurmenntun.lbhi.is/jarningar_hofhirda/
Kennari á námskeiðunum er Sigurður Torfi Sigurðsson járningameistari og ráðunautur hjá Ráðgjafamiðstöð landbúnaðarins.
